FINKI Admin

Здружението на информатичарите на Македонија (ЗИМ) и годинава се придружува кон напорите за промовирање на информатиката и алгоритамското размислување на учениците од основното и средното образование, и по шести пат го организира интернационалниот натпревар ДАБАР. Истиот се одржува во преку 50 држави во светот.

По успехот од 2019-та година, кога над 200 училишта и околу 25 000 ученици и наставници од нашата држава земаа учество на натпреварот, со што Македонија беше помеѓу државите со (процентуално) најголем број на учесници, Ве повикуваме и годинава да се вклучите во активноста.

Дабар е интернационален предизвик (еден вид натпревар), наменет за ученици од основните и средните училишта (почнувајќи со 3то одделение), кој има за цел да ја промовира информатиката и сродните науки. Истиот е исклучително популарен, се спроведува во многу држави и има добиено повеќе признанија и награди на разни научни конференции. Задачите кои им се даваат на учениците се создадени со цел да ги мотивираат истите да размислуваат за принципите, идеите и концептите поврзани со информатиката и технологијата. Натпреварот вообичаено се спроведува на училишните компјутери, како едноставна наставна активност во рамките на еден наставен час (според можностите, секој клас може да учествува во различен термин).

Во Македонија, по одложувањето на Дабар 2020 заради пандемијата со КОВИД-19, истиот се одржува во тековната 2021-ва година, во облик на онлајн настан, во периодот 15-26 февруари 2021. Поради КОВИД-19, настанот се организира во изменета форма – еден вид интересна активност, каде што учениците можат анонимно да решаваат задачи и веднаш (при самото решавање) да дознаат кој е точниот одговор на задачата. Нема да се доделуваат сертификати (бидејќи не постои никаква можност за контрола при внесувањето на податоци и решавањето од дома), а задачите ќе бидат од минати натпревари. Регистрација за натпреварот не е потребна, а за спроведување на натпреварот не е потребна никаква подготовка на компјутерите или инсталација на дополнителни програми и алатки. За да учествува во натпреварот, секој ученик треба само да го пристапи сајтот talent.mk.

ЗИМ и годинава овозможи учеството на натпреварувачите да е бесплатно. Со цел да ја промовираме оваа активност и во Република Македонија, се надеваме на поддршка од сите основни и средни училишта во Македонија. На тој начин, заедно можеме да ги промовираме компјутерските науки кај учениците, со што ќе придонесеме за нивниот развој, како и за развојот на нашата држава.

Сите информации кои не можат да се најдат на сајтот talent.mk може да ги побарате на dabar.makedonija@gmail.com

Соопштение до медиуми за испратено писмо-реакција до МОН за новата концепција за основно образование

Здружението на информатичари на Македонија (ЗИМ), кое во јавноста во последните години е препознато најмногу преку освоените медали постигнати со учениците на врвните интернационални натпревари по информатика, денес испрати писмо со реакција до МОН за новопредложената концепција на основно образование.

Во писмото на почеток се нотира дека темите од информатика (информатичко размислување, програмирање, дигитална писменост) моментално се застапени уште во трето одделение во наставните програми и дека оваа застапеност е од 2015. година, што Македонија ја смести во првите земји кои го имплементираа ова во нивните наставни планови и програми. Ваквиот чекор во следните неколку години беше следен од голем број развиени земји, како САД, членките на ЕУ, Обединетото кралство, кои во истиот период пристапија кон воведување на овие содржини.

Главната критика е дека со новиот концепт кој што е изложен, наместо да се оди во насока на зајакнување на условите за реализација на воведените информатички содржини (преку обуки на наставниците, набавка на соодветен хардвер и софтвер, изнаоѓање на креативни решенија за задржување на информатичарите во образованието) се оди неколку чекори наназад и се брише и тоа што претходно е постигнато. Исто така, насловот на предметот „Техника, технологија и информатика” спојува многу различни, во делови и несродни области, и е неразбирливо вклучен во таканаречена група Б задолжителни предмети, без да се земе предвид дека информатиката е дел од STEM образованието.

Според ЗИМ, треба да се препознае потребата на учениците да им се даде добра основа уште од најмала возраст за да тие бидат способни да ја изберат информатиката како нивна идна професија. Тоа овозможува земјата да има голем и профитабилен информатички сектор, кој не само што згрижува значаен дел од работната сила, туку за нив обезбедува високи примања, за државата овозможува раст и зголемен извоз, како и висок приход во пензискиот систем.

На крај, од ЗИМ апелираат, како што усвојувањето на јазикот е задача на наставниците по јазик (мајчин или странски), како што усвојувањето на математиката е задача на наставниците по математика, така и темите од информатичката наука и информатичката писменост да бидат задача на стручни кадри, наставници по информатика. Со брзиот развој на информатиката, наставниците по информатика треба да бидат значајна поддршка и на одделенските наставници во реализација на темите од информатика во пониските одделенија. Тие се противат на укинувањето на претходно воведените теми од информатика во раната возраст, апелираат да се направат напори информатиката да се изучува во континуитет од трето до деветто одделение, со особена промоција на името на предметот, како би се дал фокус и би се заинтересирале што повеќе ученици да ја изберат информатиката како нивна идна професија.

На 29.12.2020, во облик на онлајн состанок на платформата Zoom, се одржа Годишното собрание на Здружението на Информатичари на Македонија (ЗИМ).

Македонскиот сениорски тим освои еден бронзен медал на IATI 2020

Од 19.11.2020 до 22.11.2020, во облик на онлајн натпревар, се одржа XII Интернационален есенски турнир (IATI 2020) во програмирање во Шумен, Бугарија. На овој натпревар, на кој учествуваат повеќе земји кои што секоја година се високо рангирани на ИОИ, во организација на ЗИМ, учествуваа и македонски ученици.

Во конкуренција на 216 натпреварувачи од 13 земји (Азербејџан, Ерменија, Белгија, Белорусија, Бугарија, Кипар, Грузија, Израел, Македонија, Романија, Русија, Србија, Украина), нашиот сениорски тим, составен од натпреварувачите Благојче Павлески, Андреј Шеќеров, Тео Китановски и Марко Таневски, освои еден бронзен медал. Во оваа силна конкуренција, бронзениот медал го освои ученикот Благојче Павлески од Прилеп.

Повеќе информации за натпреварот можете да најдете овде.

Од 13.09.2020 до 23.09.2020, во облик на онлајн натпревар, се одржа 32-рата по ред Интернационална Олимпијада по Информатика (ИОИ 2020).

Македонија на ИОИ 2020 ја претставуваше тимот составен од натпреварувачите Благојче Павлески, Андреј Величковски, Андреј Шекеров и Тео Китановски, како и лидерите м-р Емил Станков и д-р Бојана Котеска.

Веб страна за ИОИ 2020: https://ioi2020.sg/

XXIV Македонска Олимпијада по Информатика и I Македонска Јуниорска Олимпијада по Информатика се одржаа на 18.08.2020 (вторник) и 19.08.2020 (среда), во просториите на Sorsix.

Повеќе информации за двата натпревари можете да најдете овде.