Последни настани

Од 02.07.2017 до 08.07.2017, во Кишињев, Молдавија, се одржа XXV Балканска Олимпијада по Информатика (БОИ 2017).

Македонија на БОИ 2017 ја претставуваше тимот составен од натпреварувачите Владимир Максимовски, Филип Михов, Мартин Динев и Марко Ќаласан, како и лидерите Емил Станков и Марија Михова.

Повеќе информации за натпреварот може да прочитате овде.

Владимир Максимовски – апсолутен победник на ЈСК Интернационалната олимпијада по информатика 2017 во Измир

Своето прво учество на регионалниот натпревар по информатика, ЈСК Интернационалната олимпијада по информатика, македонскиот тим го искористи за да ги покаже своите високи квалитети, преку постигнување на извонреден резултат. Имено, во организација на Здружението на информатичарите на Македонија, дел од најдобрите македонски средношколци земаа учество на натпреварот, кој е првиот нивни интернационален настап за оваа година. Тимот е предводен од лидерите, д-р Миле Јованов и Владислав Бидиков од Факултетот за информатички науки и компјутерско инженерство (ФИНКИ), факултет кој редовно ги поддржува активностите на најдобрите информатичари.

На натпреварот, ученикот Владимир Максимовски од Штип, инаку ученик во училиштето Јахја Кемал во Скопје, го освои апсолутното прво место преку решавање на сите 10 задачи во рекордно време од 4 часа, а со тоа и златен медал. Веќе следниот натпреварувач не успеа да ги совлада сите проблеми во предвиденото време од 5 часа.

Значаен успех постигнаа и останатите натпреварувачи во кои тренерите од Здружението на информатичари на Македонија го гледаат македонскиот потенцијал за идни успеси на натпреварите кои претстојат годинава: Балканската олимпијада по информатика во Кишињев, Молдавија, на почетокот на јули, како и Интернационалната олимпијада по информатика во Техеран, Иран, на почетокот на август. Учениците Андреј Величковски и Јосиф Тепеѓозов се враќаат со сребрен медали, а Марко Чаласан, Илија Тавчиоски, Мартин Динев и Филип Даштевски со бронзени медали.

Натпреварувањето во Измир, Турција, кое се одржува од 17.06 до 21.06, е наменето за земји од балканскиот регион и за земјите кои гравитираат околу Турција. Годинава покрај Македонија, учесници се националните тимови од Азербејџан, Туркменистан и Турција.

Веб страна за ЈСК Интернационалната Олимпијада по Информатика 2017: http://www.yskioi2017.org.tr.

Три сребрени и три бронзени медали за македонските јуниорски информатичари на МГ купот во Белград

Годинава, по петти пат, Здружението на информатичарите на Македонија (ЗИМ) со две екипи учествува на МГ Купот, кој се одржува во периодот 26.06.2017 – 01.07.2017 во Белград, Србија. Од осум македонски јуниорски натпреварувачи, на возраст до 16 години, шестмина се враќаат со освоени медали. Притоа, Андреј Величковски од Куманово, Јосиф Тепеѓозов од Скопје и Благојче Павлески од Прилеп освоија сребрени медали, а Кристина Тасева и Даријан Шекеров од Скопје, како и Благојче Овезоски од Прилеп, со бронзени медали.

Успехот на овој натпревар е од големо значење за Македонија и за Здружението на информатичарите, затоа што првиот македонски тим на натпреварувањето по информатика се пласираше на 3-то место во вкупен пласман, веднаш зад два тима од Романија, надминувајќи ги резултатски тимовите од Бугарија, Србија, Русија, Германија, Хрватска, Босна и Херцеговина, Словенија и Црна Гора. МГ купот е престижен натпревар во информатика, математика и физика, на кој годинава учествуваат 30 тимови, односно 120 натпреварувачи од 13 земји од светот.

Учествувајќи на овој натпревар, ЗИМ продолжува со подготвувањето на нашите најдобри ученици во областа на програмирањето, за што подобар успех на претстојните: Балканската олимпијада по информатика во Кишињев, Молдавија, на почетокот на јули, Интернационалната олимпијада по информатика во Техеран, Иран, на почетокот на август, како и Европската јуниорска олимпијада по информатика во Софија, Бугарија, во септември. Годинава подготовките ги подржуваат и Факултетот за информатички науки и компјутерско инженерство (ФИНКИ), Семос едукација и Сорсикс, а како поддржувачи за патувањата покрај Агенцијата за млади и спорт на Македонија, МИОА, се јавуваат и општествено одговорните Фондација Телеком за Македонија и Докстеам. Системот за подготовка за натпреварите mendo.mk, креиран од Здружението, е достапен во текот на целата година за сите заинтересирани натпреварувачи.

Веб страна за МГ Купот 2017: http://www.cup.mg.edu.rs

На 17.05.2017, во просториите на Факултетот за информатички науки и компјутерско инженерство (ФИНКИ), на Технолошко-металуршкиот факултет (ТМФ) во Скопје, се одржа XI Државeн натпревар по информатика за основно образование – апликативни вештини. 

XXI Македонска Олимпијада по Информатика се одржа на 21.04.2017 (петок) и 22.04.2017 (сабота), во просториите на Факултетот за информатички науки и компјутерско инженерство и во просториите на Sorsix.

Повеќе информации за натпреварот можете да најдете овде.

На 1 април 2017 година, во просториите на Факултетот за информатички науки и компјутерско инженерство (ФИНКИ) на Технолошко-металуршкиот факултет (ТМФ) во Скопје, се одржа XXVIII Државен натпревар по информатика за учениците од средно и основно образование.

Повеќе информации за натпреварот можете да најдете овде.

XXV Регионален натпревар по информатика се одржa на 04 март 2017 година, во два региони: Скопје и Струмица.

Повеќе информации за натпреварот можете да најдете овде.

На 14.06.2017, со почеток во 9:30 часот, ќе се одржи работилница на тема „Computational thinking in relation with IBL: theory and practices“

Во рамки на соработката помеѓу Македонската академија на науки и уметности и Бугарската академија на науки и уметности, заедно со Здружението на информатичари на Македонија,Сојузот на Математичари на Македонија и Сојузот на математичари и информатичари на Бугарија се организира заеднички

УЧЕНИЧКИ ИНСТИТУТ ПО МАТЕМАТИКА И ИНФОРМАТИКА

Целта на Институтот е да организира воведување на младите талентирани ученици за математика и информатика (на возраст до четврта година од средните училишта)  во научно-истражувачка работа. 

Учениците подготвуваат труд на одредена тема од математика/информатика предложена од Институтот, од ментор или самостојно избрана тема. Подготовката е темата е индивидуална или во коавторство со најмногу уште еден автор, самостојно или под раководство на ментор од училиштето.

Трудовите ќе бидат рецензирани, и најдобрите автори ќе бидат поканети да ги презентираат трудовите на третата Ученичка конференција по математика и информатика. 

Дополнително,

– 10 автори на трудови ќе добијат стипендии од фирмата SORSIX за школата School of Тhe Future.

– Академијата на науки и уметности и фирмата SORSIX ќе покријат еднонеделно учеството на Летната Школа по Математика и Информатика во Благоевград, Бугарија за 2-5 ученици.

 Трудовите треба да се најават кај Марија Михова,  marija.mihova@finki.ukim.mk до 01.03.2017, со наслов и краток апстракт, па да се подготват и пратат до 10.04.2017.

Терминот за одржување на конференцијата ќе биде определен по добивањето на проектите. Прелиминарен термин е 21.04.2017. Побарувањата за изработка на проектот се дадени подолу.

Побарувања за изработка на проектот 

Текстот на проектот треба да е напишан на компјутерски едитор на текст (MS Word, LaTeX) на македонски јазик, со обем не помалку од 10 страници и не повеќе од 50 страници, оформен на следниов начин: заглавна страница, резиме на македонски јазик до 100 збора; резиме на англиски јазик до 100 збора. Во резимето треба да биде напишано од која област е проектот и какви се оригиналните придонеси на авторите. Трудот се разделува на глави/секции и започнува со вовед, во кој се формулираат целите и задачите на проектот и се прави кратка анотација на содржината на останатите глави. Проектот завршува со заклучок, во кој се опишува како се постигнати целите, при што се одбележува и придонесот на авторите. На крај се дава список на искористена литература. 

Во проектите по информатика и информациски технологии со апликативен карактер трудот треба да содржи: опис на областа; опис на апликативниот систем (кој не зависи од реализацијата); избор на технички и програмски средства и опис на реализацијата. Во прилог можат да бидат вклучени, програмски код и пример излези. 

Проектите по информатика и информациски технологии треба да бидат придружени со кодот кој е искористен, неопходен за подробното запознавање на рецензентите со разработката.

Оценување 

Основни показатели при оценувањето се јасност и последователност на изложеното, оригиналност, коректност на резултатите, отсуство на технички и правописни грешки, прегледност на цртежи и графикони, целосното оформување. 

Презентација 

Времето за презентација е 20-30 мин., кои вклучуваат и 5 минути за прашања, одговори и дискусија. Презентацијата треба да биде кратка и јасна, да дава точна претстава за суштината на проектот и најмногу за придонесот на авторот/те во темата.