Последни настани

Прв златен медал во историјата за македонски учесник на Балканската олимпијада по информатика

На 28-мата Балканска Олимпијада по Информатика (БОИ 2021), која од 24-ти до 29-ти ноември се одржува во Шумен, Бугарија, македонските средношколци го постигнаа највисокиот резултат во скоро 30 годишната традиција на ова натпреварување. Македонскиот тим на овој престижен натпревар во програмирање, составен од учениците Благојче Павлески, Марко Таневски, Андреј Шекеров и Тео Китановски, предводени од лидерите, д-р Емил Станков и Мартин Динев од Факултетот за информатички науки и компјутерско инженерство (ФИНКИ), освои еден златен и еден сребрен медал, како и една олимписка пофалба.

БОИ 2021 се одржува онлајн, согласно со условите кои ги диктира ковид пандемијата, а на настанот учествуваат вкупно 37 од најдобрите средношколци во областа на компјутерските науки, кои беа избрани преку годишните национални натпревари во програмирање на следните балкански земји: Албанија, Босна и Херцеговина, Бугарија, Кипар, Грција, Македонија, Молдавија, Романија, Србија и Словенија. Во ваква силна конкуренција, историскиот златен медал за Македонија го освои Благојче Павлески, ученик од Прилеп, во четврта година во ПСУ „Јахја Кемал” во Скопје. Ученикот Марко Таневски, исто така од Прилеп, освои сребрен медал, што го става во неколкутемина на комплетната листа на освојувачи на сребрени медали за нашата земја. Овој огромен успех беше надополнет и со резултатот на Андреј Шекеров од Скопје, кој освои олимписка пофалба.

Дополнително, на Шуменскиот турнир, интернационален натпревар кој се одржува онлајн во паралела со балканската олимпијада, Сара Стефановска од македонскиот јуниорски тим освои бронзен медал. Сара е ученичка од Крива Паланка запишана во Математичко-информатичката гимназија во Скопје. Таа за ова одличје се избори во конкуренција на 168 натпреварувачи од петнаесетина земји.

Нашиот тим традиционално се избира преку целогодишен циклус натпревари кој го организира Здружението на информатичарите на Македонија (ЗИМ), годинава поддржан од Факултетот за информатички науки и компјутерско инженерство (ФИНКИ) и општествено одговорните компании Нетцетера и Семос Едукација. Натпреварите се одржуваат преку системот mendo.mk кој е одржуван волонтерски од ЗИМ и е достапен во текот на целта година за сите заинтересирани натпреварувачи.

Д-р Миле Јованов, претседател на ЗИМ, и долгогодишен претседател на Балканската олимпијада, за овој голем успех изјави: „Резултатот остварен на овој натпревар претставува продолжување на традицијата на успешни претставувања на Македонија на интернационалните информатички олимпијади во последниве десетина години и уште една нова потврда за знаењата и вештините од областа на компјутерските науки што ги поседуваат нашите ученици. Според мене, успехот се должи на напорите на Здружението редовно да работи со талентираните ученици, како и воведувањето на информатиката и темите од програмирање во основното и средното образование во првата половина на претходната деценија. За жал, со последните измени и нови концепции информатиката се маргинализира, а гласот на Здружението, кое претходно беше двигател на позитивните промени, сега се игнорира од државните институции. Со ваквиот пристап, расте мојата скепса за идни големи успеси во областа на информатиката во нашата земја.”.

Следната, 29-та по ред, Балканска олимпијада по информатика (БОИ 2022), треба да се одржи идната година во Љубљана, Словенија.

Од 24.11.2021 до 29.11.2021, во облик на онлајн натпревар, се одржа XXVIII Балканска Олимпијада по Информатика (БОИ 2021). БОИ 2021 се одржа во рамките на XIII Интернационален есенски турнир во програмирање – IATI 2021, кој традиционално се одржува во Шумен, Бугарија.

Македонија на БОИ 2021 ја претставуваше тимот составен од натпреварувачите Андреј Шекеров, Благојче Павлески, Марко Таневски и Тео Китановски, како и лидерите Емил Станков и Мартин Динев.

Повеќе информации за натпреварот може да прочитате овде.

Од 24.08.2021 до 28.08.2021, во облик на онлајн натпревар, се одржа петтата по ред Европска Јуниорска Олимпијада по Информатика (ЕЈОИ 2021), како и 14-тата по ред Јуниорска Балканска Олимпијада по Информатика (ЈБОИ 2021).

Македонија на ЕЈОИ 2021 и ЈБОИ 2021 ја претставуваше тимот составен од натпреварувачите Давид Каранфилов, Јован Михов, Јована Трифуноска и Сара Стефановска, како и лидерите Миле Јованов и Емил Станков.

Повеќе информации за натпреварот може да прочитате овде.

Нов успех на македонските јуниори – информатичари: Бронзен медал и две олимписки пофалби на Јуниорската балканска олимпијада по информатика

На 14-тата по ред Јуниорска балканска олимпијада по информатика (ЈБОИ 2021), која од 24-ти до 28-ми август се одржа во облик на онлајн натпревар, младите македонски ученици – информатичари постигнаа нов успех, освојувајќи еден бронзен медал и две олимписки пофалби. Бронзениот медал за Македонија на ова престижно меѓународно натпреварување го освои Јован Михов од Скопје, а олимписки пофалби им беа доделени на Давид Каранфилов од Радовиш и Сара Стефановска од Крива Паланка. Четврти член на македонскиот тим беше Јована Трифуноска од Тетово, а тимот беше раководен од лидерите, д-р Миле Јованов и м-р Емил Станков од Факултетот за информатички науки и компјутерско инженерство (ФИНКИ). Овие ученици беа избрани преку целогодишен циклус на натпревари, којшто редовно се организира од Здружението на информатичарите на Македонија (ЗИМ), а оваа година се одржуваше по 32-ри пат. Во учебната 2021/2022 година, тие ќе бидат ученици во Математичко-информатичката гимназија во Скопје.

Официјален домаќин на ЈБОИ 2021 беше Романија, а главен организатор беше Здружението за извонредност и перформанси во информатиката на Романија (Society of Excellence and Performance in Informatics). Заради пандемијата, оваа година за прв пат Јуниорската балканска олимпијада по информатика се спроведуваше онлајн, при што натпреварувачите од секој национален тим беа надгледувани од страна на нивните лидери. Дополнително, заради обезбедување на комплетна регуларност на натпреварот, натпреварувачите беа и под постојан видео надзор (видео камера и софтвер за снимање на сите активности на натпреварувачот на компјутерот на кој што работи). Македонскиот тим се натпреваруваше од просториите на Факултетот за информатички науки и компјутерско инженерство (ФИНКИ), кој ги овозможи сите услови за квалитетно техничко поврзување со Романија.

На годинешната Јуниорска балканска олимпијада по информатика учествуваа тимови составени од најмногу четири натпреварувачи – ученици до 15,5 години, од следните десет Балкански земји: Босна и Херцеговина, Бугарија, Грција, Македонија, Молдавија, Кипар, Романија, Србија, Словенија и Турција.

Доколку условите го дозволат тоа, следната, 15-та по ред, Jуниорска балканска олимпијада по информатика (ЈБОИ 2022) ќе се одржи идната година, на лице место – во Никозија, Кипар.

Од 13.06.2021 до 19.06.2021, во облик на онлајн натпревар, се одржа првата Европска Олимпијада по Информатика за Девојки (ЕОИД 2021).

Македонија на ЕОИД 2021 ја претставуваше тимот составен од натпреварувачките Сара Стефановска, Атина Рувинова, Кристина Тасева и Софија Велковска, како и лидерите Емил Станков и Владислав Бидиков.

Повеќе информации за натпреварот може да прочитате овде.

Од годинава и Европска Олимпијада по Информатика за девојки: Две бронзи за девојките од македонскиот тим на олимпијадата во Цирих, Швајцарија!

Здружението на информатичари на Македонија (ЗИМ) и годинава испраќа тимови на престижните интернационални натпревари по информатика. Првиот голем настан е Европската Олимпијада по Информатика за девојки (ЕОИД), која годинава за прв пат се одржа во Цирих, Швајцарија, од 13-ти до 19-ти јуни.

Заради актуелната пандемија, учеството на тимовите е онлајн, а учесниците од нашиот тим се сместени во хотел во државава, во деновите од натпреварот. Тимот составен од натпреварувачите Кристина Тасева од Скопје, Сара Стефановска од Крива Паланка, Атина Рувинова од Охрид и Софија Велковска од Скопје, раководени од лидерите м-р Емил Станков и Владислав Бидиков од Факултетот за информатички науки и компјутерско инженерство (ФИНКИ), освои два бронзени медала, првиот за Кристина Тасева – ученичка во трета година, и Сара Стефановска – ученичка во деветто одделение.

Примарна цел на оваа олимпијада за девојки е да се поттикне интересот за информатиката и кај девојките, кои се во забележливо помал процент присутни на редовните интернационални олимпијади по информатика. Олимпијадата се стреми да овозможи на најдобрите европски талентирани ученички да ги покажат знаењата и вештините кои што ги стекнале во областа на информатиката, а поконкретно во програмирањето. Секоја земја на ЕОИД учествува со тим кој се состои од 4 натпреварувачки, лидер и заменик лидер на тимот, а ученичките се натпреваруваат во решавање на алгоритамски проблеми во два натпреварувачки дена.

На ЕОИД 2021 учествуваат вкупно 157 ученици од 31 европска земја и 12 земји – гости надвор од европскиот континент (како САД, Канада, Индија, Јапонија, Египет, Казахстан и други). Голем е успехот на македонските натпреварувачки во оваа исклучително силна конкуренција да освојат два бронзени медала, а и останатите две натпреварувачки да се во рангот на поени кои овозможуваат посебна олимписка пофалба.

Како што изјави претседателот на ЗИМ, д-р Миле Јованов: „Среќен сум што и во овие вонредни услови, во период кога имавме силен ковид бран во Македонија, успеавме да ги избереме и подготвиме најдобрите натпреварувачки, за да можеме да се натпреваруваме на исто ниво со учесници од 43 земји. Очигледно дека воведувањето на предметите Основи на програмирање и работа со компјутер од трето од петто одделение, и потоа предметите Информатика, Програмирање и Програмски јазици даваат резултати. Жално е што во моментов со новата концепција за основно образование сето тоа се брише и Македонија наместо да остане меѓу земјите кои беа предводнички во воведувањето на информатиката во наставата се враќа многу чекори назад, а содржините поврзани со информатиката и програмирањето се маргинализираат и занемаруваат. Се надевам дека наскоро овој погрешен пристап ќе биде исправен. Изразувам благодарност до општествено одговорната компанија Нетцетера, која ги поддржа подготовките на македонскиот тим.”        

Следната, втора по ред, Европска Олимпијада по Информатика за девојки (ЕОИД 2022), ќе се одржи идната година во Турција.

Следен настан, кој започнува денес (19.06.2021) е 33-тата Интернационалната Олимпијада по Информатика (ИОИ 2021), во Сингапур, каде Македонија редовно учествува со успех.

Веб страна за ЕОИД 2021: https://egoi.ch/en/.